Biodibersidadearen Nazinoarteko Eguna ospatuko da asteburu honetan Busturiko Madariaga Dorretxean

| Ikusi handiago | Argazki originala

Busturiko Madariaga Torretxean kokatuta dagoan Euskadiko Biodibersidade Zentroan Biodibersidadearen Nazinoarteko Eguna ospatuko da asteburu honetan jentea biodibersidadearen garrantziaz eta bere galbidea geldiarazoteko beharraz kontzientzietako asmoz. Antolatu diran ekintzetan parte hartzeko, ezinbestekoa da erreserbea egitea 94 6870402 telefonora deituz, zentroko arduradunek adierazo dabenez.

Biodibersiadearen Nazinoarteko Egunaren ospakizuna bihar hasiko da, maiatzak 22, goizeko 10:00etan, Urdaibaiko paduretan zehar egingo dan ibilbide gidatu bategaz, eta, ondoren, Madariaga Torretxera bertara bisitea. Ordu berean, Ambar alkarteak zetazeoen inguruko ordu bateko dobako berbaldia emongo dau; ondoren, Matxitxako lurmuturretik zetazeoen begiztapena egingo dabe.

Arratsalderako, naturan erabilten diran komunikazino desbardinetan eta soinuetan oinarritutako jolas eta lehiaketak antolatu dira. Eguna amaitzeko, astronomiaren ganeko tailer teoriko-praktikoa izango da, 'Biodibertsitatea zeruan irudikaturik' izenburupean. Parte-hartzaileek zeruaren mobimentuak eta konstelazinoak ezagutzeko eta behaketak zelan egin ikasteko aukerea izango dabe.

Domekan, goizeko 11:30ean, biodibersidadearen magiaz gozauko dabe bertaratutakoek Eriz magoaren eskutik. Ikuskizunak ordu bateko iraupena izango dau eta doban izango da. Azkenik, arratsaldeko 17:00etatik aurrera, ibilbide gidatua izango da itsasontziz, Bermeo, Izaro eta Ogoño arteko ibilbidea eginez. Jarduera honek hamar euroko prezioa dauka, eta 12 urtetik beherakoentzat eta 65 urtetik gorakoentzat zazpi eurokoa.

Euskadiko Biodibersidade Zentroa-Madariaga Torretxea Eusko Jaurlaritzako Ingurumen, Lurralde Plangintza, Nekazaritza eta Arrantza Saileko Ihobe Ingurumenaren Jarduerarako soziedade publikoak gestionetan dau.