'Patxi Ros Saria', Sopelanako Lasterketa Nudistea irailaren 19an, Barinatxen

| Ikusi handiago | Argazki originala

Euskal Naturista Alkarteak Sopelanako Udalaren babesagaz beste urte batez antolatu dau Sopelako Lasterketa Nudistea 'Patxi Ros Saria'. Datorren domekan, irailaren 19an korriduko da lasterketea, eguerdiko 12:00etatik aurrera, Barinatxe Hondartzan.

Korrikolariek bete beharreko distantzia 5.000 metrokoa da eta hare gogorrean korriduko da. Lasterketeak sei kategoria ditu: gizonezkoak, emakumezkoak, beteranoak (40 urtetik gorakoak), umeak (14 urtetik beherakoak), eta alkarteko naturistentzat gizonezkoak eta emakumezkoak. Umeak nagusiakaz batera abiatuko dira, baina ibilbide laburragoa beteko dabe. Lasterketea amaitzen daben parte-hartzaile guztiek oparia jasoko dabe. Bestalde, kategoria bakotxeko lehen hiru sailkatuentzat garaikurra egongo da.

Parte-hartzaileek biluzik egin behar dabe lasterketea, halan da be, nahi izan ezkero, txapela, eguzkitarako betaurrekoak, galtzerdiak eta oinetakoak jantzi ahal izango ditue. Arau hori beteten ez dauen parte-hartzailea berehala deskalifikauko dabe eta antolatzaileek lasterketatik kanpora eroango dabe.

Izena emoteko epea irailaren 17an amaituko da. Izena emoteko ondoko bideak erabili: e-mailez (carreranudista@ene-naturismo.org) edo lasterketako webgunean. Bestalde, lasterketan egunean bertan izena emon daiteke, goizeko 11:30k arte, Barinatxe Hondartzan. Nazinoarteko kutsua izango dau lasterketeak, orain arte izena emon dabelako hiru britainiar, frantses batek, italiar batek, irlandar batek eta alemaniar batek.