BFAren eta BCAM zentroaren arteko alkarlana abangoardiako ikerketa matematikoa garatzeko Bizkaian

| Ikusi handiago | Argazki originala

Eusebio Larrazabal Bizkaia Xede alkarteko presidente eta Bizkaiko Foru Aldundiko Lan eta Trebakuntzako diputaduak eta Enrique Zuazua BCAM Basque Center for Applied Mathematics zentroaren zuzendari zientifikoak bi erakundeen arteko lankidetza hitzarmena izenpetu dabe. Akordioari esker, erakunde biek alkarregaz abiarazoko ditue enpresen arloko ikerketa eta garapen-proiektuak, bai eta katalogo zientifiko barri bat be, Bizkaiko I+G+B arloan dagozan eragile pribatuen ikerketa matematiko aplikatuaren inguruko eskariak batuko dituana.

Hitzarmen horren barruan, Bizkaiko Foru Aldundiak urtean 25.000 euro emongo deutsoz BCAM zentroari, Lan eta Trebakuntza Sailaren menpe dagoan bizkaia:xede alkartearen bitartez, 2009, 2010 eta 2011ko ekitaldi ekonomikoetarako laguntza moduan.

Akordioaren sinatzaileen arabera, behar-beharrezkoa da matematika aplikatuko proiektuak sustatzea, baldin eta lortu nahi bada diziplina hori I+G+B arloan txertatzea. 'Ia mundu guztiak autortzen dau behar hori, batez be gure inguruko herrialde aurreratuenetan', adierazo dabe.

Matematika aplikatua eta konputazino zientifikoa industriaren arlo guztietan apliketan dira: aireontzi, ibilgailu edo motorren fabrikazinoan; ordenagailu zein komunikazino-sistemen garapenean; farmako barrien garraio eta garapenean. Beste hainbat ekintza-arlotan be aplika daiteke, besteak beste, ingurumena, baliabide naturalen kudeaketa, ekonomia eta finantza edo garapen iraunkorrean.

Jarduera horreek guztiak Bizkaiko Foru Aldundiak Bizkaia:Xede alkartearen bidez markautako helburu estrategikoen artean dagoz, eta hareen guztien helburua da lehen mailako profesionalak eta ikertzaileak bilatu eta erakarteko politika aktiboa sustatzea, profesional eta ikertzaileok Bizkaiko Lurralde Historikoan gera daitezan.

Bizkaia:Xede irabazi-asmorik bako alkartea da, Bizkaiko Foru Aldundiak sustatzen dauena, eta, gainera, alkartearen zuzendaritza-batzordean Bizkaian punta-puntakoak diran enpresa eta erakundeek be parte hartzen dabe, esaterako, Sener, Idom, ITP, Iberdrola, Euskaltel, BBK, CIC Biogune eta Euskal Herriko eta Deustuko unibersidadeak. Bada, alkartearen eginkizuna da barrikuntzearen eta ezagutza aurreratuaren prozesuetan gaitutako personak hartzeko eta erakarteko beharrezkoak diran baldintzak ezartzen laguntzea Bizkaian.

BCAM (Basque Center for Applied Mathematics), bestalde, Eusko Jaurlaritzearen Hezkuntza, Unibersidade eta Ikerketa Sailak sustatutako erakundea da, eta haren eginkizuna da matematika aplikatuaren arloan kalidade handiko diziplinarteko ikerketea garatzea, gizarte guztiarentzat onuragarria izan daiten. Zentroa goi mailako prestakuntzea dauen ikertzaile-talde batek osotzen dau, eta nazinoarteko bikaintasun-sare zabala be badauka. Izan be, zentroaren helburua da matematika aplikatuaren arloan erreferentziako zentroa izatea nazinoartean, eta, horretarako, mundu mailako aurrerapen zientifiko eta teknologikoak sustatuko ditu.