Zeanuritik Ubidera galtzadan zehar

Zemendiaren 8an, zapatuan, egingo da Zeanuri-Ubide, Larreen Mankomunidadearen II. Zeharkaldia, Zeanuriko Ipizki eta Joko Alai, eta Ubideko Amexier eta Ortuzar alkarteen antolakuntzapean, eta udalerri bietako Udalen, Gorbeialde Landa Garapenerako Alkartearen eta BBKren laguntzinoagaz.

Oinezko martxa honegaz hiru helburu nagusi finkatu ditue antolatzaileek: alde batetik, Zeanuriko eta Ubideko Udalek larreen mankomunidadearen inguruan urtero egiten daben batzar historikoa ezagutzera emotea eta balioestea; bestetik, zeanuriztarrei zein ubideztarrei zein bisitariei udalerri bietako ingurumariak (bereziki Ubidetik eta Zeanuritik igaroz Gasteiz eta Bilbo lotzen zituan Erdi Aroko galtzadea) ezagutzera emotea; eta azkenik, Zeanuriko eta Ubideko herritarren arteko hartu-emonak sendotzea.

Udalbatza bien batzarra

Orain dala gizaldi bat baino gehiagotik Zeanuriko eta Ubideko Udalak alkartu egiten dira, urte batean udaletxe batean eta hurrengoan bestean, udalerri bakotxean izena emondako abelburuen zenbakiak aurkezteko eta kontuak egiteko. Jarraian, batzar agiria sinatu eta bi Udaletako zinegotziek batera bazkaltzen dabe. Urtero errepetiduten dan ohiturea eta betebeharra da. Antza, batzar horren zergaitia, bazka-larreen aprobetxamenduaren inguruan udalerri biek historian zehar izandako gorabeherei eta istiluei amaierea emoteko adostutako akordioa da.

Urtero egiten da Udalen batzar hori nahiz bere jatorria ezezaguna izan ubideztar eta zeanuriztar gehienentzat. Beraz, ikerketa sakona beharko leuken jazoerea da. Hori da etorkizunera begira antolatzaileek planteau daben beste erronka bat.

Kontuak kontu, zeharkaldiaren urtekerea Zeanuriko plazan, udaletxearen aurrean, izango da goizeko 10:00etan. Plazatik abiatuz, Undurragako urtegiaren ertzetik jarraituko dabe Ipiñabururantz; hemendik Saldropora igon beharko dabe; igoera horretan, Txareta izeneko parajean, arbelgune bat azalduko jake, eta gizaldietan zehar gurdiek itxitako gurpil-markak ikusi ahal izango ditue bertan. Saldropoko zelaikadan, Lapursasitik Otsarretako pagadiaren ondotik igaro eta Ubiderantz joko dabe; azken txanpa honetan galtzadearen aztarnak argi eta garbi azaltzen diran tarte batetik ibilteko aukerea izango dabe ibiltariek, Ubideko plazara heldu baino lehen.

Udalen batzarra

Zeharkaldiaren amaieran, hamabiren bat kilometro eroango ditue oinetan ibiltariek, baina seguru hitzorduari erantzutea mereziduko dauela, Zeanuri eta Ubide lotzen zituan galtzadea eta bere inguruan azaltzen dan ondare historiko-etnografikoa ezagutzeagaz batera, udagoienean natureak azaltzen dauen koloreen sinfoniaz gozetako aukerea izango dabe eta.

Zeanuri-Ubide Bazka-Larreen Mankomunidadearen II. Zeharkaldiari amaierea emoteko 13:00ean, udaletxepeko aretoan Ubide eta Zeanuriko zinegotziek batzarra egingo dabe; batzar horretan idazkariek udalerri bakotxean izena emon daben abelburuen zenbakiak azaldu eta kontuak egingo ditue, eta amaieran bilera agiria sinatuko dabe, danak batera bazkaltzera joan aurretik. Datorren urtean gauza bera egingo da, baina oraingoan Zeanuriko udaletxean, eta bazkaria pagetea zeanuriztarrei egokituko jake.

Ibilaldiari buruzko zehetasunak

* Izena emotea: Zeanuriko plazan, debalde.
* Autobus zerbitzua (debalde): goizeko 09:15ean Ubideko plazatik Zeanurira, ubidarrak edota Ubiden kotxea ixten dabenak Zeanuriko abiapuntura eroateko.
Eguerdiko 13:30etan: Ubidetik Zeanurira, zeanuriztarrak edota Zeanurin kotxea itxi dabenak eroateko.
* Urteerea: 10:00etan.
* Ibilbidea: 12 kilometro inguru. Ordu bi eta erdi inguruko iraupena, martxa lasaian.
* 13:00etan: Ubideko eta Zeanuriko Udalbatzen batzarra bazka-larreen mankomunidadearen kontuak egiteko eta batzar agiria sinatzeko.
* Antolatzaileak: Ipizki Taldea, Joko Alai Alkartea, Amexier Mendi Alkartea eta Ortuzar Ubideko Gazte Asanbladea.
* Laguntzaileak: Zeanuriko Udala, Ubideko Udala, Gorbeialde Landa Garapenerako Alkartea eta BBK.

Ikusi argazki guztiak handiago