Gaztetxoen Eguna Balmasedan Bizkaiko Gaztetxuen Koordinakundearen ekinbidez

Bizkaiko Gaztetxoen Koordinakundeak datorren domekan, apirilaren 20an, egingo dau Balmasedan, 2008ko Gaztetxo Eguna. Jaialdia Enkarterriko herriko San Severino plazan egingo da, ekitaldiz beteta, 11:15an hasi eta 18:45an amaituz, jaiaren antolatzaileek prentsaurrekoan Bilbon iragarri dabenez.

Bizkaiko Gaztetxoen Koordinakundea orain dala 30 urtetik gazteriaren arloan eta aisialdian lanean dabilen irabazi asmorik bako alkartea da. Gaur egun, udalerri desbardinetan kokaturiko 20 taldez osotzen da: Alonsotegi, Gordexola, Balmaseda, Astrabudua, Sondika, Barakaldo, Santurtzi, Erandio goikoa, Erandio bekoa, Plentzia, Urduliz, Algorta, Basauri, Leioa, Igorre, Artea, Olabeaga, Zalla, Mungia eta Larrazabal-Begoña. Talde horreek guztiek 6 eta 14 urte bitarteko haur eta gazteei zuzenduriko ekintza eta ekitaldi desbardinak antolatzen ditue, euskerearen erabilerea, euskal kultura eta balioen heziketea (alkartasuna, tolerantzia, adiskidetasuna) sustatzeko asmoz. Helburu horreek lortzeko garatzen diran ekintzak Aisialdiko Begirale titulua daben gazte boluntarioak antolatu eta egiten ditue.

Gaztetxo Eguna urtean behin Bizkaiko udalerri baten antolatzen dan jaialdia da. Ekitaldian gaztetxoen mobimentuagaz loturea daben persona guztiek, Gaztetxo Eskolea osotzen dabenek eta Koordinakundeko kide guztiek hartzen dabe parte. Egunean zehar, haur eta gazteek, beste hainbat lagunekaz batera, hezigarriak diran jolas-jarduera desbardinetan parte hartzeko aukerea izaten dabe.

Jaialdiaren ezaugarrietako bat urtero antolatzen dan Gaztetxo Egunerako kartel lehiaketea da. Lehiaketa honetan gaztetxo talde guztiek parte hartzeko aukerea dabe. 2008ko Gaztetxo Egunaren kartelaren irabazlea Santurtziko Gaztetxo taldea izan da.

Esan bezela, aurtengo jaialdia domeka honetan egingo da, Balmasedako San Severino plazan. Bertan, besteak beste, eskulanak egiteko tailerrak, puzgarriak, herri kirolak, bazkaria, disko-festa eta txokolatadea izango dira egun osoan zehar.