‘Hegoak’, ‘Dantza-kopla zaharrak’ eta 'Idatz & Mintz 43' plazaratu ditu Labayruk

Bizkaie! 2007-11-29 13:08

Labayru Ikastegiak literatura lan bi kaleratu ditu, bata ahozko literatureari jagokona, bestea sorkuntzeari. Jabier Kalzakortak kopla zaharren errepertorioaren barruan, dantzarako diranak aukeratu eta horreen sorta ederrak batu ditu. Asko han-hor-hemen sakabanatuta egondakoak dira, orain arte ezezagunak, eta danak errepertorio zaharrekoak. Horrezaz gainera, azterketa lantxu ederrakaz hornidu dau corpusa. Horreek guztiak ordenean jarri eta irakurlearen esku jarri ditu, euskal bibliografian inoiz izan dogun corpus osotuena aurkeztuz.

Iratxe Ormatzak, barriz, ‘Hegoak’ bere lehenengo sorkuntza lan luzea dakarsku. Narratzailea morrala lepoan hartuta, Hego Amerikara joan da, hango sei herrialdetan zehar (Peru, Bolivia, Argentina, Uruguai, Paraguay eta Brasil) ibili da lau hilebetean eta lekuan lekuko esperientziak eta ikusitakoak eragindako zirrarea azaltzen ditu bidaia-liburu honetan.

Era berean, Idatz & Mintz aldizkariaren 43. alean ikerketa-lan bi daukaguz: bata Adolfo Arejitarena, bestea Jabier Kalzakortarena. Jon Aregok itzulpena dakarsku. Sorkuntzeari jagokonean, narrazinoetan Asel Luzarragarena eta Xabier Zalbiderena eta poema lanetan, gure aldizkari honetara batu barriak diran Iñigo Roque eta Miren Ibarluzearen eskutik datoz.

Aldizkari honek separatea dakar, Eusebio Erkiagaren Neurtitzak, Igone Etxebarriak preparauta.

Iratxe Ormatza (Bakio, 1971)

Soziologiako ikasketak (Yorkeko unibersidadean) eta graduondokoa (Canterburyko unibersidadean) egin zituan Inglaterran. Handik etorri eta soziologian behar egin eban, besteak beste. Gerora, itzulpengintza masterra egi eban EHUn , eta itzultzaile, zuzentzaile eta irakasle ibili zan da.

Azken urteotan, barriz, Bizkaie! agerkari digitalean, Euskaldunak munduan’ atalaren ardurea izan dau, eta 2007ra arte idatzi dau bertan.

Jabier Kalzakorta (Markina, 1961)

Deustuko unibersidadean Euskal Filologian lizentziau zan 1984an. Ordutik Euskal Telebistan hizkuntza sailean egindako aldi laburra kenduta, irakaskuntzan jardun izan dau Deustuko unibersidadean bertan., Itzulpen Masterrean lehenengo eta Euskal Filologian gero, gaur arte. Horrezaz ganera, Lbayruko kolaboratzailea da, euskaltzain urgazlea eta Mendebalde Alkarteko kidea. Ikertzaile fina da herri literatureari eta ahozkotasunari jagokozan alderdietan batez beeta makinatxu bat lan argitaratu ditu orain arte.

Ikusi argazki guztiak handiago