Francisco Umbral idazle eta kazetaria hil da

| Ikusi handiago | Argazki originala

Francisco Umbral idazle eta kazetari espainiarra hil da goizaldean, Madrilgo Monteprincipe (Boadilla del Monte) klinikan, 72 urte zituala.

1935ko maiatzaren 11n jaio zan Madrilen, baina Valladoliden emon eban gaztaroa. Han egin zituan hain zuzen be kazetaritzeagaz lotutako lehenengo lanak, ‘El Norte de Castilla’ egunkarian. 1990etik ‘El Mundo’-n ebilen kolaboratzaile, egunero ‘Los placeres y los días’ izeneko zutabea eginaz. 'Eugenio d'Ors' izenburukoa izan da zutabe horretan argitaratutako azken idatzia, garagarrilaren 28an, hain zuzen be.Halan da be, aurretik ‘Diario 16’, ‘El País’ eta ‘Interviu’ argitalpenetan be parte hartu eban.

Zutabegile legez egindako lana ‘Mesonero Romanos’ sariagaz saritu eben 2003an. Literatur arloan azkenaldian idatzitako liburuei jagokenez, barriz, ‘Dias felices en Arguelles’ (2005), ‘Los metales nocturnos’ (2003), ‘Un ser de lejanias’ (2001) eta ‘Madrid, tribu urbana’ (2000) lanak nabarmendu daitekez.

Umbralek 80 liburu baino gehiago idatzi zituan, besteak beste, ‘Las ninfas’ (1975), ‘Mortal y rosa (1975), ‘La noche que llegue al Cafe Gijon’ (1977), 'Madrid 1940: Memorias de un joven fascista' (1993) eta ‘El socialista sentimental’ (1999).

Francisco Umbralek makinatxu bat sari irabazi zituan, azpimarragarrienak azken urteotan irabazitako Kazetaritzako Sari Nazionala (1994), Letren Asturiasko Printzea (1996) eta Cervantes (2000) sariak.

2004an, Ana Caballé catalunyar irakasleak 'Francisco Umbral. El frío de una vida' argitaratu eban, idazle honi buruzko baimenik bako lehenengo biografia.