Maiatzean kaleratuko da ‘Mendiminez’

‘Mendiminez’ goi mendietan hildako hainbat euskal mendizaleren biografiaz osoturiko liburuak aurtengo maiatzean ikusiko dau argia. Ramon Olasagasti kazetariak (Berrobi, 1972) proiektu honegaz irabazi eban igaz Debako Udalak eta Elkar argitaletxeak antolatutako Tene Mujika bekea, Historia Hurbilaz idaztekoa, eta laster ikusiko dau argia, Elkar-en ‘Lekuko’ bilduman, formatu handian eta argazkiz horniduta.

Pirinioetatik Alpeetara eta Himalaiara euskal mendizaleek azken urteetan egindako bidean zorionak askozaz gehiago izan badira be, aldian-aldian zoritxar batzuk be jazo dira. Arrazoia zehazten erraza ez bada be, beste edozein istripuk baino emozino handiagoa sortu izan dabe gurean zoritxarreko albisteok. Deitu epika, deitu mistika, deitu gaztetasun etenaren drama... mendiak badauka euskal gizartean holako hunkipen ahalmena.

Felix Iñurrategi, Jose Luis Zuloaga ‘Zulu’, Manu Badiola, Atxo Apellaniz, Miriam Garcia, Xabier Ormazabal, Antonio Miranda, Mikel Ruiz de Apodaka, Pepe Rayo, Antxon Alonso, Ruben Aramendia, Xabier Ansa, aitzindariak, Pumorin hildako gazteak… Horra protagonistak; euren ibilbidea, biografia, soslaia eta oroitzapena eskaini nahi leuke lan honek; mendiminez bizi baitziran, mendia zalako euren pasinoa, euren bizitza. Euren mendiminaz eta bizitzaz da liburu hau, baina baita euren hutsuneak itxitako minaz be, mendia min iturri bihurtzen baita holakoak pasetan diranean.

Bestalde, aurtengo deialdian saria emon barik ixtea erabagi dau Lorea Agirrek, Elixabete Garmendiak eta Pruden Garziak osoturiko epaimahaiak, aurkeztutako lanak ez jakozalako egokitzen oinarrietan eskaturikoari. Maiatzean, Olasagastiren liburua kaleeratzeagaz batera plazaratuko dira oinarri barriak be.