Katrinak eragindakoa konpontzeko dirua txanpana, bitxiak eta porno-filmak erosteko erabili da

| Ikusi handiago | Argazki originala

Katrina eta Rita urakanek New Orleans (Ameriketako Estadu Batuak) erabat txikituta itxi eben baina, askotan pasetan dan legez, auzokoaren ezbeharretatik ‘probetxua’ ataraten dabe askok. Kontu-ikuskaritza enpresa batek egindako ikerketearen arabera, 200 dolarreko txanpain-botilatan eta porno-filmetan 1.000 miloe dolar gehiago gastau dira urakanak eragindako kalteak konpontzeko eta biktimei laguntzeko zuzendutako dirutzatik. Gastu horreek Ameriketako Estadu Batuetako Krisi Agentziaren kreditu txartelen eta banku-txekeen bidez egin dira.

Euren etxeetatik atara ebezan personei emondako banku-txekeak diamanteak, bitxiak, txanpana, bidaiak, striptease klubetako zerbitzuak eta estaduko abogadu onenari dibortzio-tramitazinoa egiteko erabili dira, besteak beste. Ganera, CNNren arabera, ‘orain arte hori bakarrik egiaztau ahal izan da; batek daki zer gehiago egin dan diruagaz’.

Irregulartasun horreez gan, beste asko be atzemon dira: kasu batzuetan, laguntzinoa eskatu eben personei urakanak ez eutsen kalterik eragin edota kalteak eragin eutsozan familia berak bi biderrez jaso eban laguntzinoa. Ganera, Krisi Agentziaren esanetan, 750 bat kreditu-txartel ‘galduta’ dagoz eta beste 1,5 miloe dolarren erabilerea ez dago zehaztuta.