Automobilgintzako Hiztegia aurkeztu dabe gaur

BATZ, Cikautxo, Ekin, Elay, GKN eta Maier enpresek, Elhuyar Hizkuntza eta Teknologiako terminologia-adituen aholkularitzapean, Automobilgintza Hiztegia osotu dabe, sei hizkuntzatan: ingelesa, gaztelania, euskerea, frantsesa, alemana eta txinerea. Automobilgintzako 2.637 kontzeptu batzen ditu hiztegiak, 16 alorretan sailkatuak, eta Interneten konsultau daiteke oso-osorik. Gaur goizean aurkeztu dabe proiektua, Zornotzako Automotive Intelligence Centeren, hiztegian parte hartu daben enpresetako ordezkariek: Karmelo Uriarte, BATZeko hobekuntzako arduraduna; Gotzon Juaristi, Cikautxoko lehendakaria; Esteban Garitaonandia, Ekineko euskara-batzordeko koordinatzailea; Ketxus Amasorrain, Elayko injinerutzako arduraduna; Kepa Galparsoro, GKN Driveline Zumaiako prebentzino-arduraduna; Julen Madariaga, Maierreko lehendakaria eta, azkenik, Elhuyarretik, Leire Cancio zuzendari nagusia eta Garbiñe Alkiza, Automobilgintza Hiztegiaren koordinatzailea.

Azken urteetan, globalizazinoaren aroak bultzatuta, automobilgintzako enpresek nazinoarteko merkatura egin dabe salto, eta nazinoartean izan dogun eta izaten gagozan esperientziak erakusten deusku lehiakorrak izateko ezinbestekoa dala hizkuntzak egoki kudeatzea eta terminologia espezializatua eta bateratua erabiltea, adierazo dau Karmelo Uriarte BATZeko ordezkariak. Komunikazino eraginkorra izan nahi badogu laneko prozesuetan, bezero eta hornitzaileakazko hartu-emonetan eta langileen arteko harrtu-emonetan, hizkuntza-hesiak gainditzea da lehen pausua. Eta hori lortzeko, hiztegi espezializatu hau egiteko beharra ikusi genduan, erantsi dau Uriartek.

Elhuyarrek ibilbide oparoa dauka terminologiaren arloan, eta teknologia aurreratuak garatu ditu hiztegigintzarako Hizkuntza eta Teknologiako I+G unidadean. Elhuyarren garatu doguzan teknologiak aplikauta, automobilgintzako sektorean harremanak egiteko mundu osoan erabilten diran hizkuntzak (ingelesa, gaztelania, frantsesa, alemana eta txinera) harremanetan jartea lortu dogu, baita euskereagaz be, terminologia fidagarri, landu eta eguneratu bat eskainiz, adierazo dau Leire Canciok. Elhuyarren aspaldi jaubetu ginan eleaniztasunaren garrantziaz; horregaitik, ezinbestekoa da hizkuntzak kudeatzeko baliabideak eta tresnak sortzea, enpresa bakotxaren beharren arabera, gehitu dau Canciok.

Azkenik, Garbiñe Alkizak Automobilgintzako Hiztegia egiteko emon diran pausuen barri emon dau: Sei enpresok gure esku itxi ditue euren eguneroko lanean erabilten daben dokumentazinoa eta barruko hiztegiak. Dokumentazino horretatik abiatuz, terminoen erauzketa automatikoa egin dogu, eta, holan, sei enpresetako terminologia lotzea lortu. Terminoak kontzeptuka antolatu doguz, sei hizkuntzetako ordainak emon, eta kontzeptu bakotxa jagokon arloan sailkatu dogu. Bestalde, lan honetarako, ezinbestekoa izan da Elhuyarreko terminologoen eta automobilgintza-adituen arteko etenbako alkarlana. Horreei esker, 2.637 kontzeptuak arloka sailkatu ahal izan doguz, eta hizkuntza guztietako ordainak jaso azpimarratu dau Alkizak.

Hiztegi hau proiektu handiago baten hasierea baino ez da, eta automobilgintzearen sektorerako erreferentzia bihurtzea nahi dabe sustatzaileek. Horregaitik, hiztegia abiapuntutzat hartuta, automobilgintzako enpresen erakusleiho eta informazino-iturri izango dan webgune bat sortu nahi dabe. Hori dala eta, deia luzatu deutse automobilgintzako beste enpresei, hemendik aurrera alkarlanean jarduteko.

Ikusi argazki guztiak handiago