Markina-Xemeinen Jazzaldia egingo dabe lehenengoz

| Ikusi handiago | Argazki originala

Markina-Xemeingo Udalak, Uhagon Kulturgunearen bidez, lehenengoz eratu dau Jazzaldia, honako helburuakaz: Musikea publikoari hurreratzeko kalidadezko hitzordu bat sortzea; jazza uriburuetatik atera eta herrietara be eroatea; musikariak hurretik ezagutzeko aukerea emotea; eta Markina-Xemein ezagutzera emotea.

Lehenengo edizino hau Karmen jaien aurretxuan antolatzea erabagi dabe Uhagonekoek, jentearen erantzuna ona izango dalakoan. Ganera, jazzaldiak Markina-Xemeinegaz lotura estua izatea bilatu dabe: batetik, kontzertuetan joko daben musikarietako batzuk bertakoak dira (Pablo Fernandez Arrieta eta Haizea Martiartu); bestetik, karteleko irudi nagusia pelotan jokatzeko zestea da, Markinako tradizinoagaz bat.

Kontuak kontu, garagarrilaren 6an hasiko da jaialdia, Pablo Fdz Arrieta Trio & Carme Canela taldearen emonaldiagaz. Hurrengo egunean, Victor de Diego Organ Trioren txandea izango da. Hilaren 8an, Bilbao Lindy Band taldeak joko dau eta, ganera, master-classa antolatuko dabe Victor de Diego Triokoek. Amaitzeko, 9an, Haizea Martiartu & Dixie Monsters ibiliko da alde zaharreko kaleetatik.

Azken egunekoa izan ezik, emonaldiak Uhagoneko terrazan izango dira eta doban sartu ahal izango da.