Peio Ospitalek bakarkako lehenengo lana aurkeztuko dau Igorren

| Ikusi handiago | Argazki originala

Peio Ospital (1948-Itsasu) abeslari lapurtarrak Igorren abestuko dau martiaren 24an, barikuan. Kantaldia, Arratiako parrokiek martian antolatu daben egitarauaren barruko ekitaldietako bat da eta Igorreko parrokian izango da arrastiko 19:30ean.

Emonaldi horretan Peiok bere lehen bakarkako lana aurkeztuko dau, Arnasa… Hatsa… Bizia izenburukoa. Berrogeita bost urtean Euskal Herri osoan plazaz plaza ibili dan Peio eta Pantxoa bikote ospetsuaren buztarritik askatzeak lan personalagoa egiteko aukerea eskaintzen deutsola dino Ospitalek.

Peio Ospital, kantu konprometiduen bidez, 60. hamarkadearen amaieran euskal kulturearen pizkundean parte hartu eben kantari eta intelektualen artekoa da. Hainbatek erresistentzia edota kontra-podereaz berba egiten dau 60ko hamarkadearen amaierako eta 70eko hamarkadearen hasierako sasoiaren ganean berba egiterakoan.

Sasoi ha, berrogeita bost urteko ibilbidea eta hamalau disko atzean itxita, bere lehen bakarkako lanagaz dator orain Peio: disko hau bihurgune bat da, aldaketa sakon bat. Norabide barri bat, bare-aldiaren beharrak eta hausnarketa pasinoak sustaturik, azkenean funtsezkoenera itzultzeko: bizia.

Arnasa... Hatsa... Bizia... dira hamalau sorkuntzen hari nagusia, baita diskoaren izenburua; Hau da bizidun guztiak batez be akuilatzen dituen indarra, dino kantari lapurtarrak, eta segiduten dau: Ez bila hemen galderei erantzunik, entzun Mañex Erdozaintzi-k aitatzen eban Biziaren mugimendu dardara, edota Iratzeder-ek Lurren pil pil gozoa, zuon barruan kantetan!

Lan hau bideratzeko, laguntzaile paregabeak izan ditu: bederatzi testu Andoni Salamero zumarragar olerkariarenak dira, berbakaz jolasteko daukan trebetasun magikoa agertuz; testu bat Itxaro Bordarena, beste bat Joxe Arregirena. Baxurko (1890-1957) hondarrabiarrak 1937an jarritako bertso batzuk batzen dira eta beste testu bat dago Martine Larroque xiberutarrarena, berak eta Pitzgarriko beste sei kidek izenpetua. Azkenik, nik neuk egindako bertso batzuk.

Musikeari jagokonez, Mixel Ducau izan dot laguntzaile estimatu parebakoa; berak sortu ditu zazpi doinu; Anton Valverdek hiru; Andoni Salamerok bere bi testu musikatu ditu. Xabier Leteren doinu bat be erabili dot, eta azkena herrikoia da. Gauzak soil eta sotil egin gura izan doguz, oinarri hirukotxa erabiliz: ahotsa, gitarrea eta pianoa. Moldaketak Mixel Ducau eta Paul Smet flandiar adiskidearenak dira. Benetako alkarlan honek emoten deutso disko osoari ezusteko kolorea, sorpresa goxo bat. Gonzalo Tejadak jarri dau kontrabaxua, eta Iñaki Ospital nire semeak, egin ditu grabazino eta nahasketa lanak.

Igorreko kantaldia izango da Hego Euskal Herrian Peiok egiten dauen bere diskoaren bigarren aurkezpena, aurretik Donostian egingo dau eta. Sarrerak Igorreko Gau-Lora kafetegian, Zeanuriko Jubilatuen tabernan eta Otxandioko Fonda tabernan dagoz salgai 10 euroan aurretik erosten badira eta 12 euroan kontzertuaren egunean erosita.