Lehoi, Simbolos, Carnavalea, Baldosa curiosa, Bilbao se disfraza eta Frankissmouse dira 2013ko Aratusteetako sei kartel finalistak

Bizkaie! 2013-01-08 14:45

Lehoi, Simbolos, Carnavalea, Baldosa curiosa, Bilbao se disfraza eta Frankissmouse kartelak Aratusteetako Kartel Lehiaketearen finalistak dira, Bilboko Udaleko Jaietako Sailak gaur goizean ezagutzera emon dauenez. Horreen artean aukeratuko da Bilboko Aratusteetako irudi nagusia. 2013ko Aratusteak zezeilaren 7tik eta 12ra ospatuko dira.

Bilboko Udaleko Jaietako Zinegotzi eta epaimahaiaren buru Itziar Urtasunek, Jai Batzordeko ordezkari politiko eta Bilboko Udaleko EAJ-ko zinegotzi Pilar Muerzak, Jai Batzordeko ordezkari politiko eta Bilboko Udaleko PPko zinegotzi Beatriz Marcosek, Bilboko Konpartsetako Iñaki Leonardok, Deiako bertako barrien zuzendari Itziar Gorospek, Triángulo publizidade enpresako Agustín Martínezek eta 2008ko Zarambolas izan zan Nati Ortiz de Zaratek osotutako epai-mahaiak aukeratu ditu kartelak.

Aurten 90 kartel aukeztu dira lehiaketara, igaz, barriz, 107. Kartelen jatorriari jagokjnez Kantabria, Madril, Melilla, Bartzelona, Guadalajara, Zaragoza, Nafarroa, Burgos, Gerona, Kordoba, Valentzia, Errioxa, Lerida eta Asturiasetik bialdutako lanak jaso dira. Halan da be, ohikoa danez, gehienak Bilbo, Bizkaia, Gipuzkoa eta Arabatik heldu dira. Irabazleak 2.000 euroko saria jasoko dau.

Sei kartel finalistak Zabalgune Eraikinean, Udalaren web orrian eta komunikabide laguntzaileetan jarriko dira ikusgai urtarrilaren 14tik 18ra bitartean. Denporaldi horretan herritarrek botoa emoteko aukerea izango dabe. Botoak holan emongo dira: zuzenean Zabalgune Eraikinean bertan, Udalaren web orriaren bidez (www.bilbao.net) eta lehiaketearen laguntzaile diran komunikabideen bidez. Aurtengo komunikabide laguntzaileak hurrengoak dira: Deia eta El Correo egunkariak euren web orrialdeen bidez, Que Nervion dobako egunkaria, Ser Bilbao (Hoy por Hoy Bilbao), Radio Euskadi (Graffiti) eta Onda Vasca (La tarde en Euskadi), ETB (bere blogaren bidez eta baita Euskadi Directoko Facebookaren bitartez), Telebilbao (La Capital) eta Tele 7 (Objetivo Euskadi).

Herri-botazino honen bidez puntuazinoaren %75 erabagiko da (aitatutako sistema bakotxari %25 jagokolarik). Gainerako %25 epaimahaiaren botazinoaren bidez erabagiko da. Kartel irabazlea hilaren 21tik 25era bitartean jakinarazoko da.

Ikusi argazki guztiak handiago