Irabazleak eta galtzaileak

Erabiltzailearen aurpegia Mundua Konpondu Guran 2016-01-24 19:01

Gobernua eskuratuta be, 176 diputaduen babesik barik gatxa izango litxake gobernetako lana. Eta egoerea korapilatuteko gogoratu daigun Alderdi Popularrak gehiengo osoa daukala legeei bigarren irakurketea egiteko eratutako Senatuan.

Oso nahasia dago gaur egungo Espainiako egoera politikoa. Gobernua osotzeko gehiengo sendoa lortutea ez da bape lan erraza azken hauteskundeen ondoren. Edozein demokraziatan parlamentuetako zenbakiek agintzen dabe. Eta Espainiako kasua ez da salbuespena.

Espainiako kasuan, 176 da zenbaki magikoa. 176 diputatuen babesa lortu behar da gehiengo osoa eskuratzeko lehenengo bueltan. Gobernua eskuratuta be, 176 diputaduen babesik barik gatxa izango litxake gobernetako lana. Eta egoerea korapilatuteko gogoratu daigun Alderdi Popularrak gehiengo osoa daukala legeei bigarren irakurketea egiteko eratutako Senatuan.

Egoerea normala izango balitz Alderdi Popularrak izango leuke gehiengo bat antolatuteko ardurea, baina Espainiako egoera politikoa ez da normala. Akabuko legealdian gehiengo osoa izan dabe popularrek eta euren aurrean mobilizau dan boto kopuru handia PPren kontra joan zan hauteskundeetan. Eta popularren kontrako botoa eskatu eta gero, nekez babestu daiteke popularren gobernu bat.

PPren aurrean dagozanak batzea ez da lan erraza. Sozialistek euren historiako emoitzarik kaxkarrena lortu dabe eta haren liderra bota egin gura dabe baroiek eta baronesak. Gehiengoa eskuratu ahal izateko ezkerreko indarrak eta abertzaleak batu beharko leukez Pedro Sanchezek. Ta ez dau emoten Espainiako botere ekonomikoak eta mediatikoak (txanpon beraren bi aldeak) hori onartuteko prest dagozanik. Beraz, aukera bi baino ez dira geratuten. Koalizino haundia osotu leiteke popularrak, sozialistak eta Ciudadanos alderdiakaz, hirurak gobernuan egonda edota horreetako bateren bat babesa emoten Parlamentutik. Ez dot aukera hori posible ikusten Pedro Sanchez PSOE alderdiaren buru dan bitartean, batez be jazotako guztiaren ondoren ezin dauelako PPri babesa emon gobernua liderau barik. Eta, ganera, Podemos eta abertzaleak izango litzatekez oposizino bakarra. Epe luzera begira, bere buruari tiro emotea dala pentsetan dau.

Bigarren aukerea hauteskundeak errepetidutea litxake orain gobernu sendoa antolatzea ezinezkoa dalako. Aukera horrek irabazleak eta galtzaileak ekarriko leukez: sozialistek eta Ciudadanosekoek uste dabe bigarren txanda baten babesa galduko leukiela Podemosen eta popularren mesedetan.

Edozelan be, politikan itxurak egitea mamia bezain inportantea da holako egoera batean. Inok ez dau gura danon aurrean esan benetan zer gura dauen. Popularrek eta Podemosek hauteskundeak aurreratzea gura dabe horixe dalako komenidu jakena, edo holan pentsetan dabe. Ciudadanoseko Albert Riverak benetan gura dauena da Espainiako presidentea izan eta koalizino handian lider izatea. Sozialistei... ez daukat argi zer komenidu jaken sozialistei. Hamaikatxu alderdikaz ituna egitea mortala izango litxake eurentzako. Zelan erantzun abertzaleen eskakizunei botoen % 30 Andaluzian eskuratu eta gero? Eta zelan erantzun Podemosen eskakizunei botere ekonomikoen presinoen aurrean burua makurtu barik? Pedro Sanchezek ez dauka bestelako aukerarik bere burua salbau gura badau. Ahaleginduko da gobernu aurrerakoia lortzen baina daborduko jakingo dau Podemosek eta bere alderdiko batek baino gehiagok helburu bera daukiela: Pedro Sanchez erditik kendutea.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu