Gaur hasiko da Bilboko Aste Nagusiko kartela aukeratzeko botazinoa

Bizkaie! 2018-07-02 13:24   Kulturea

Bilboko Udalak Aste Nagusia iragarriko dauen kartela aukeratzeko botoa emoteko epea edegi dau; hain zuzen ere, gaur, hilak 2, hasi eta barikura arte, hilaren 6ra arte, emon ahal izango da botoa.

Aurreko urteetan legez, kartela bozketa-sistema mistoaren bidez aukeratuko da: erabagiaren balioaren % 66 herritarren esku egongo da eta ganerako % 33 epaimahaiaren esku.

Nola soinu halan zeinu, Zazpi bikote, Denok bat, Disfrutarás de las fiestas y respetarás las del prójimo como si fueran tuyas, Pinjaia eta Rock Stars (strike a pose) dira lehiaketako kartel finalistak. Horreen artean aukeratuko da irabazlea, modu honetan:

- Herritarren bozketa presentziala (% 33) Euskal Museora (Unamuno plaza, 4) joanda. Astelehenetik barikura, 10:00etatik 19:00etara (martitzenean zarratuta dago, asteko jaieguna hartzen dabelako). Botoa emoteko nortasun-agiria aurkeztu behar da (NAN, gidabaimena edo antzekoa).

- Udalaren webgunearen eta hedabide laguntzaileenen bidez egindako herritarren botazinoa: EITB, El Correo, Deia, Gara, Onda Vasca, Onda Cero, Cadena SER, Tele Bilbao, Radio Popular, Bizkaia Irratia, Bilbo Hiria, Orain.eus, Hamaika TB, El Nervión eta Radio Nervión (% 33).

- Epaimahaiaren erabakia (% 33).

Irabazleak 3.000 euroko saria jasoko dau eta 2018ko Aste Nagusia iragarriko dauen irudia berea izateko ohorea izango dau.

Parte hartzea % 9,4 gehitu da

Lehiaketara 175 kartel aurkeztu ditue, igaz baino % 9,4 gehiago (orduan 160 aurkeztu zituen). Jatorri askotakoak dira, besteak beste, Iparralde, Nafarroa, Bartzelona, Madril, Albacete, Valentzia, Sevilla eta A Coruñatik bialdutakoak; halan da be, gehienak bertokoak dira.

Finalistak aukeratzeko lehenengo balorazinoan, epaimahaiak kontuan hartu ditu kalidade teknikoa eta lehiaketako oinarriakaz bat etortea.