Gontzal Sanchez Negro idazle abadiñarrak eta Matias Candeira madrildarrak irabazi dabe XXXIII. Gabriel Aresti Ipuin Lehiaketea

Bizkaie! 2016-10-17 09:19   Kulturea

Gabriel Aresti Ipuin Lehiaketea urtero deitzen dau Bilboko Udalak,  literatur jarduera eta talentu barrien agerpena sustatzeko helburuagaz, baita Gabriel Aresti (1933-1975) idazle bilbotarraren gomuteari eutsi eta haren lana gogorarazo eta bizirik iraunarazotea be.

Bilboko Udalak deitutako Gabriel Aresti Ipuin Lehiaketearen XXXIII. edizioak baditu irabazleak. Gontzal Sánchez Negro da irabazlea euskerazko kategorian Heriotza maitasunez kontakizunagaz, eta gaztelaniaz idatzitako ipuinen artean, barriz, saria, 2014an akzesita irabazi eban Matías Candeira madrildarrak irabazi dau, Hija pródiga kontakizunagaitik. Saria 3.500 eurokoa da kategoria bakotxean.

Horrezaz gan, epaimahaiak 1.750 euroko hiru akzesit emon deutsez Itziar Beasaini, Udamin errearen istorioak euskeraz idatzitako ipuinagaitik, eta Miguel Ángel González Gonzálei eta Raúl Nagoreri, gaztelaniaz idatzitako ipuinen kategorian, Poner una lavadora eta Las incorrecciones kontakizunakaitik, hurranez hurran.

Sarien banaketa ekitaldia pasa dan barikuan egin zan, Gabriel Aresti 1933ko urriaren 14an jaio zan egun berean, hain zuzen be. Ekitaldia Bilboko Udaletxeko Areto Arabiarrean egin zan, eta Nekane Alonso Kultura zinegotzia eta epaimahaiko presidentea bertan egon zan, epaimahaiko zenbait kidegaz eta azken edizino honetan saria irabazi daben egile batzuekaz batera. Aurtengo edizinoko epaimahaiak sariketearen kalidade maila handia eta nazinoarteko izakerea azpimarratu ditu, 1.648 ipuin jaso baitira, % 32 Espainia kanpotik bialdutakoak, ia herrialde latinoamerikar guztietatik, eta baita AEB, Frantzia, Alemania, Ukraina, Suedia edo Italiatik be. Aurkeztu diran lan guztien artean, 46 euskeraz idatzitakoak izan dira.

Euskerazko kategorian, Unai Elorriaga, Ana Urkiza eta Arantxa Urretabizkaia idazleek osotutako epaimahaiaren eretxiz, Gontzal Sánchez Negro idazle abadiñarraren Heriotza Maitasunez kontakizuna da edizino honetan aurkeztu diranen artetik onena. Kontakizun horri jagokonez, heriotzea ulertzeko konbita dala esan dau epaimahaiak, eta estilo ederra eta tonu zaindua azpimarratu ditu, baita ahots desbardinak erabili izana be, gizartean tabua dan gaiaren ganeko hausnarketa sakona egiteko.

1973an, Abadiñon jaiotako Gontzal Sánchez Euskal Filologian Lizentziatua da UPV – EHUn, eta momentu honetan gaztelaniazko irakaslea da Bigarren Hezkuntzan eta Batxilergoan. Donostian bizi da aspalditik. Beste sari batzuen artean, lehen saria irabazi eban Mario Ángel Marrodán (2011) XIV. poesia sariketan, Zakarrontzian poema hauek aurkitu ditut, nik neuk botata poesia-liburuagaz, eta lehen saria Errenteriako XXXV. Ipuin Lehiaketan (2015), Azken etxola hura kontakizunagaz.


Gaztelaniaz

Gaztelaniaz aurkeztutako testuak baloretako Juan Bautista Bilbao, Aixa de la Cruz, María Maizkurrena, Juan Carlos Márquez, Itziar Mínguez, Miren Elixabete Tolarechipi eta Pedro Ugarte idazleek osotu daben epaimahaiak, Matías Candeira madrildarraren Hija pródiga lana aukeratu dau. Epaimahaiko kideen eretxiz, lan horretan azpimarragarria da prosearen kalidadea, azkenari buruzko erreferentzien irudimenezko planteamenduaren izaera personala eta testuaren potentzia.

Matías Candeira (Madril, 1984) idazle eta gidoilaria da. 2009tik literatur sorkuntza irakasle legez egiten dau lan hainbat zentro eta erakundetan, Madrilgo Idazle Eskolan, batez be. Fiebre (Candaya, 2015) eleberriaren, La segunda vida (Aristas Martínez, 2014) eleberri ilustratuaren eta zenbait kontakizun libururen egilea da: La soledad de los ventrílocuos (Tropo editores, 2009), Antes de las jirafas (Páginas de espuma, 2011) eta Todo irá bien (Salto de página, 2013).

Bere ibilbidean ospe handiko literatur sari ugari jaso ditu, horreen artean INJUVE Narratiba Saria, Ignacio Aldecoa Ipuin Lehiaketea, Madrilgo Udaleko Sortzaile Gazteen Sariketea edo Tomás Fermín de Arteta Nazinoarteko Narratiba Saria. Egin dauen literatur lanaren aintzatespen moduan, bere liburuak idazteko zenbait sorkuntza beka be jaso ditu. 2010ean, Antonio Gala Fundazinoak Sortzaile gazteentzat emoten dauena eta 2013an, Han Nèfkens Fundazinoaren Literatur Sorkuntzearen bekea.

Horrezaz gan, Bilboko Udalak, bakotxak 1.750 euro dituan hiru akzesit –gaztelaniaz bi eta bat euskeraz– emon ditu. Raúl Nagore (Iruñea, 1941) kazetari nafarrak sinatu dauen Las Incorrecciones lanean, epaimahaiak parodiarako indarra eta planteetan dauen proposamenaren desegokitasun politikoa azpimarratu ditu. Miguel Ángel González (Madril, 1982) idazle eta dramaturgo madrildar gazteari jagokonez, bigarren akzesita eskuratu dau, Poner la lavadora lanari esker. Epaimahaiko kideek ahotsaren berezitasuna eta neurrikoa eta aldi berean hunkigarria dan estiloa balorau ditu. Euskerazko modalidadeko akzesita Itziar Beasain idazle eta filologoari emon jako, Udamin errearen istorioak kontakizunagaitik.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu